व्हर्च्युअल ट्रीप विथ झुंबा इन माळीनगर व्हाया विंचुर टाकळी
आज 'नया कुछ सिखते है' या जिल्हा परिषद प्राथमिक शाळा टाकळी विंचूर ता.येवला येथील प्रयोगशील शिक्षक गजानन उदार यांच्या नाविन्यपूर्ण उपक्रमात सहावे पुष्प गुंफता आले ते 'व्हर्च्युअल ट्रीप विथ झुंबा इन माळीनगर व्हाया विंचूर टाकळी' थेट झूमसोबतच..!
झुंबा डान्सने मुलांना व्यायामाची आवड निर्माण व्हावी,तो का गरजेचा आहे याची थोडक्यात माहिती देण्यात आली.दोन्हीही शाळेतील विद्यार्थ्यांनी झुंबा डान्स हा खान्देशी गीत 'झुमकावाली पोर' या गाण्यावर केला.वन्स मोअरने पुन्हा एकदा एकत्र घेण्यात आला.यात मुलांनी आनंदाने सहभाग नोंदवला.मजा आली.
ही व्हर्च्युअल ट्रीप मुलांना आनंद देऊन गेली.मुलांना झुंबाने झालेला आनंद त्यांनी दिलेल्या प्रतिसादावरून कळत होता.चेहऱ्यावर ओसंडून वाहणारा आनंदच या उपक्रमाचे महत्त्व पटवून देत होता.दोन शाळांची या व्हर्च्युअल ट्रीपने भेट घडवून आणली.असा संवाद होणं आभासी का असेना होणं महत्त्वाचे आहे.
औपचारिक शिक्षणाच्या पलिकडचं अनौपचारिक शिक्षण मुलांना हवं असतं,फक्त त्याची बांधणी करतांना तो संबंध औपचारिक शिक्षणाशी सहजच जुळवता आला पाहिजे.शारीरिक शिक्षणातले,कला विषयातील बहुसंख्य बाबी या अशाच सहजच मुलांमध्ये रूजवता येतात.'नया कुछ सिखते है' या नाविन्यपूर्ण उपक्रमातून महाराष्ट्रातील प्रयोगशील शिक्षकांचे प्रयोग,थेट संवाद येथील विद्यार्थ्यांशी होतोय हे खास आहे.येणाऱ्या तांत्रिक अडचणींवर मात करून हवं असलेलं मुलांना उपलब्ध होतेय हे भारीच आहे.
आयोजक मुख्याध्यापक व सर्व शिक्षकवृंद जिल्हा परिषद प्राथमिक शाळा टाकळी विंचूर ता.निफाड जि.नाशिक यांचे या निमित्तानं ऋण व्यक्त करतो.
प्रेरक आहात..!
प्रेरणा द्या,प्रेरणा घ्या...!
